Bloemfonteiners wat iets vir die naweek beplan, moet dit liefs Saterdag doen met ’n kouefront wat teen Sondag inwoners behoorlik gaan laat bibber.
Die maksimum-voorspelling vir Saterdag is 19°C met die wind wat teen die middag ’n bietjie gaan pla. Die voorspelling vir die minimumtemperatuur vir Saterdag is 2°C.
Sondag kan ’n yskoue maksimum van slegs 11°C verwag word met temperature wat die aand tot -4°C kan daal. So maak seker die gasbottels is vol en hou genoeg antrasiet en kaggelhout gereed.
Om die koue so ’n bietjie te terg, bied Hospice Bloemfontein, Choc-huis en Aurora ’n Big Splash aan waarop deelnemers 50 m in Grey-kollege se swembad swem ten bate van dié liefdadigheidsorganisasies.
Deelnemers spring van 12:00 af in die water en die hekke open om 10:00.
Spanne van 5 elk betaal R200 vir deelname en besoekers en ondersteuners betaal R20. Zak Steyn tree op. Rig navrae by Marietjie Landsberg by 083-450-5427.
Bekende kunstenaar Martin Wessels se solo-uitstalling Baron von Kouga open Saterdag om 10:00 by Co-op Gallery in die Dan Pienaar Mall.
Balans-mark van 10:00 tot 14:00 by Sol Lifestyle Venue. Dit is in Chris Olivierweg 12, Groenvlei.
