AfriForum-gemeenskapsveiligheid het van 16 tot 18 September opleiding aan buurtwaglede gebied, wat verskillende kursusse vir buurtwagleiers, inligtingspanleiers, operasiespanleiers en steunspanleiers ingesluit het. Hierdie vier rolle vorm die kern van AfriForum se buurtwagstrukture.
Die opleiding is buite Pretoria aan onder meer die Randfontein-, Apiesrivier-, Alberton-, Rayton-Heuwelsig-, Hartbeespoort-, Hospitaalpark-, Bethlehem- en Brakpan-buurtwag gebied.
Saterdag (24/09) het AfriForum ook sy sesde protospankursus aangebied. Protospanlede is die sogenaamde spiespunt van AfriForum-buurtwagte se reaksiespanne en ontvang gespesialiseerde opleiding.
AfriForum het sowat 160 veiligheidstrukture met byna 10 000 opgeleide vrywilligers.
AfriForum se trauma-eenheid het ook die afgelope tyd 42 vrywilligers gewerf en opgelei om slagoffers van plaasaanvalle en geweldsmisdaad op die toneel by te staan.
Izel Kruger en Hennie Human, beraders van AfriForum se traumaeenheid, het vrywiligers in die Vrystaat, KwaZulu-Natal en Noordwes met kennis en vaardighede toegerus.
Die opleiding het op 13 Augustus in Bloemfontein begin met 12 vrywilligers van die Bultfontein-, Bethlehem- en Bloemfontein-buurtwag wat by die NG kerk Gardenia praktiese opleiding ondergaan het.
Hierdie opleiding is op 3 September in Potchefstroom voortgesit. Die traumaeenheid het die opleiding op 17 September by die Boereverenigingsaal in Vryheid afgesluit.
“Ná hierdie opleiding is vrywilligers in die noorde van KwaZulu-Natal goed opgelei om slagofferondersteuning in hul gemeenskappe te bied,” sê Eugene van Aswegen, distrikskoördineerder vir KwaZulu-Natal.
