’n Eerste vir Bloemfontein is die Good News-fees waarop Langenhovenpark se The Good News Club gaan geld insamel om dié woonbuurt verder op te knap.
The Good News Club (TGNC) het al reuse-werk gedoen om dié woonbuurt skoon en netjies te maak, soos slaggate wat opgevul is en die posbusse wat geverf is.
TGNC onderhou heeltyds vier openbare parke, tuine by die biblioteek en kliniek, die omgewing by die posbusse, asook verkeerseilande op hoofroetes in Langenhovenpark (Du Plessislaan uitgesluit).
“Dit is alles volhoubare projekte, aangesien ons benadering daarop gefokus is om op die duur ’n verskil te maak. Van tyd tot tyd, en namate hulpbronne beskikbaar gestel word, help TGNC ook met die herstel van slaggate, asook met eenmalige opruimingsgeleenthede, padverf-projekte en ander instandhoudingswerk in die woonbuurt,” sê Henry de Wet van TGNC.
“Ons het twee permanente werknemers in diens. TGNC wil baie graag die span aanvul deur nog twee werkers aan te stel, sodat daar daagliks meer onderhoud en verfraaiing van Langenhovenpark kan plaasvind.
“Die Good News-fees word dus hoofsaaklik vir die insameling van geld vir die salarisse van die ekstra twee werkers beoog, asook bykomende toerusting om sodoende ’n groter positiewe invloed te hê.”
De Wet sê The Good News Club is hoofsaaklik gegrond op die Gebreekte ruit-teorie.
“Die teorie stel voor dat misdadige gedrag gedy in ’n omgewing wat slordig of vuil lyk, en dat pogings om ’n gebied mooi en netjies te hou tot ’n genotvolle atmosfeer en veiliger omgewing vir inwoners bydra.”
Die fees word op 4 Maart van 15:00 af op die Towers-inkopiesentrum se parkeerterrein aangebied.
De Wet, wat die fees saam met Gert Duvenhage reël, sê hulle is opgewonde daaroor om so ’n lekker geleentheid vir die publiek aan te bied.
Daar sal tafels en stoele wees, ’n speelruimte vir kinders, kosstalletjies en ’n biertent.
Kaartjies is teen R150 by computicket.com te koop. Tafels vir ses is teen R900 beskikbaar. Kinders jonger as tien jaar kry gratis toegang.
“Dit is nie net vir inwoners van Langenhovenpark nie, maar vir almal in Bloemfontein. Maak gerus ’n draai,” nooi De Wet.
Rig navrae aan hom deur 073-462-5432 te skakel.
