’n Leerling aan die Hoër Meisieskool Oranje (OMS) is op 5 Oktober op Grey-kollege en OMS se atletiekbyeenkoms as die beste senior baanatleet aangewys.
Rumé Burger (gr. 10) het dié prestasie nou reeds op drie groot byeenkomste vanjaar vermag. Haar sege in die 100 m-nommer, in ’n tyd van 11.79, het die Olimpiese atleet Justine Palframan se byeenkomsrekord van 11.89 in 2009 uit die boeke gevee.
Rumé het ook goud in die 200 m en 100 m-aflos vir o.17-meisies verwerf. Die aflosspan (Rumé, Elizabeth Fick, Diné le Roux en Zelmarie Smook) het ook ’n byeenkomsrekord opgestel.
Danyelle Pienaar het die 400 m-hekkies met 1:02.88 gewen– meer as ’n sekonde flinker as die rekord van 2017.
Oranje se A-span was derde onder die meisiespanne op die byeenkoms.
Rumé het vroeër vanjaar die Vrystaatse rekord in die 100 m ná 19 jaar van 12.02 na 11.92 verbeter.
OMS se ander gouemedaljewenners
- Diné le Roux (100 m-hekkies);
- Erika Reynolds (driesprong);
- Lilly Burger (90 m-hekkies);
- Mienke Botha (300 m-hekkies); en
- Klara van Wyk (verspring).
