Die beste entrepreneurs word op Vrydag 6 Desember aangekondig wanneer die eindronde van The Entrepreneur 2024 in Mimosa Mall plaasvind.
The Entrepreneur is ’n dinamiese platform wat daarop gemik is om skeppingskrag en sakevernuf te bevorder.
Die kompetisie word met die geldelike steun van die Lughawensmaatskappy van Suid-Afrika (Acsa) aangebied en is die geesteskind van die ILembe-sakekamer in KwaZulu-Natal.
André van der Berg, projekkoördineerder in die Vrystaat, verduidelik die afgelope paar maande het voornemende entrepreneurs uit verskillende bedrywe hul kreatiwiteit, deursettingsvermoë en vasberadenheid ten toon gestel. Nou bly net 16 finaliste oor, gereed om mee te ding vir die gesogte toppryse.
Die eindronde van die kompetisie beloof om intellek en visie op die proef te stel.
Elke entrepreneur sal aan ’n intense onderhoud deelneem, waarin hulle hul sakeplanne moet voorlê en moeilike vrae van ’n paneel kundige beoordelaars moet beantwoord. Die onderhoude is daarop gemik om die lewensvatbaarheid, skeppingskrag en potensiële trefkrag van ondernemings te beoordeel, om te verseker dat die beste idees uitstaan.
Die entrepreneurs se produkte en dienste sal ook Vrydag in Mimosa Mall uitgestal word.
Van der Berg sê die geleentheid is nie net ’n kompetisie nie, maar ook ’n viering van entrepreneurskap en skeppingskrag.
Die finaliste sal die geleentheid hê om hul ondernemings aan die publiek, bedryfsleiers en potensiële beleggers ten toon te stel, wat waardevolle netwerkgeleenthede skep.
Die hoogtepunt van die geleentheid sal wees wanneer die pryswenners aangekondig word. Hulle sal met indrukwekkende kontantpryse wegstap. Die wenner sal R30 000 ontvang; vir die tweede plek word R25 000 toegeken; en die entrepreneur in die derde plek sal R20 000 ontvang.
Die pryse is daarop gemik om geldelike ondersteuning te bied sodat die wenners hul ondernemings na die volgende vlak kan neem.
“The Entrepreneur 2024 het ’n nuwe geslag van innoveerders geïnspireer, ’n platform geskep vir ontluikende entrepreneurs om erkenning te kry, en ’n gees van samewerking binne die sakegemeenskap bevorder,” sê Van der Berg oor die kompetisie.
“Kom beleef die geboorte van die volgende geslag sakeleiers op 6 Desember by Mimosa Mall,” nooi hy.
