Skuts van oor die land heen het op 22 en 23 April aan die nasionale proewe van die Suid-Afrikaanse Nasionale Skoleskuttersunie (Sanssu) deelgeneem.
Altesaam 54 luggeweerskuts het in vier klasse (die pistool-, veer-, presisie- en sporterafdeling) aan die proewe by die Hoërskool Sentraal in Bloemfontein deelgeneem.
Regan Hunter van die Hoërskool Fichardtpark het die goue medalje gewen vir die beste 3P-telling in die sporterafdeling (1111 uit 1 200), en hy het ook die trofee verower vir die eerste plek algeheel in die 3P en 10 m in die sporterafdeling, met ’n telling van 1 458 uit 1 600.
Die Sanssu-span, bestaande uit 21 skuts in die sporter-, presisie- en pistoolafdeling, is gekies om in Augustus in Londen aan die Britse Junior Internasionale Kompetisie te gaan deelneem.
Regan en Anine Schlebush van die Hoërskool Sentraal is in die span ingesluit.
