Paartjies het nog tot einde Julie tyd om hulle vir Bloemnuus se Troufoto van die Jaar-kompetisie in te skryf. Eers wanneer al die foto’s ontvang is, sal ’n volledige galery van al die inskrywings op Bloemnuus se Facebook-blad geplaas word, waar lesers vir hul gunstelingfoto’s kan stem.
Vir Mei is daar 14 nuwe inskrywings, wat vandag op die Facebook-blad te sien is.
Mei se wenfoto is dié van Estevan en Chareché Koen, wat op 6 November in Bethlehem getroud is.
Die algehele wenner van die kompetisie word in Augustus aangewys, met die wenpaartjie wat na ’n naweek se verblyf op die De Oude Kraal-gasteplaas kan uitsien. Stefan van Biljon van die maatskappy Creative Kilowatt borg die prys.
Paartjies wat in Bloemnuus se lesersgebied woon en sedert Augustus 2021 getroud is – of nog in Junie of Julie gaan trou – kan hul mooiste foto inskryf.
Foto’s moet van ’n goeie gehalte wees, maar hoef nie deur ’n professionele fotograaf geneem te wees nie.
Met toestemming van die bruidspaar kan fotograwe ook foto’s van paartjies inskryf.
Net een foto in jpeg-formaat kan per bruidspaar ingeskryf word.
Die inskrywing moet die paartjie se name en van/ne bevat, die troudatum en die naam van die stad of dorp waar die troue gehou is – asook die fotograaf of ateljee se naam.
Paartjies kan hulle inskryf deur die foto en inligting na bloemnuus@media24.com te stuur, met “Troufotokompetisie” in die boodskapveld.
Die 12 foto’s wat die meeste stemme in die uiteindelike galery in Augustus ontvang, sal in Bloemnuus gepubliseer word.
Die wenfoto, wat uit dié foto’s gekies sal word, sal op Bloemnuus se voorblad pronk.
Tot Julie sal ’n wenner elke maand aangewys word, en die paartjie se foto sal saam met die berig in Bloemnuus gepubliseer word.
) Creative Kilowatt bied klank, verhooggeriewe, atmosfeerbeligting en oudiovisuele aanvullings vir troues, partytjies en korporatiewe gesellighede. Die span beskik oor ’n musieklys met alles van die nuutste treffers tot die ou gunstelinge.
