’n Nuwe skietbaan wat spesiaal vir AfriForum buite Bloemfontein uitgelê is, is die naweek ingewy tydens die organisasie se dertiende protospankursus.
Dit is ook die eerste kursus van sy soort, wat in Bloemfontein aangebied word.
Negentien AfriForum-buurtwaglede van Bloemfontein asook die tak in Nottingham Road in KwaZulu-Natal, is vir dié week lange kursus uitgesoek om hul opleiding hier te ontvang.
Hul name word nou gevoeg by die meer as 220 gespesialiseerde buurtwaglede, bekend as protospanlede, wat tot dusver deur AfriForum se gemeenskapsveiligheidafdeling opgelei is.
Op dié unieke skietbaan is AfriForum se spesialis-buurtwaglede onderwerp aan realistiese simulasies met hindernisse soos doringdraad, sementblokke, afsperrings en voertuigwrakke.
Protospanlede se gespesialiseerde opleiding bied aan hulle ’n voorsprong in gemeenskapsveiligheid, taktiese vuurwapenhantering, praktiese selfverdediging, bloedingbeheer, verskeie relevante regsaspekte, misdaadtoneelhantering, die opstel van voertuigbeheerpunte en onttrekking onder vuur. Die kursus fokus ook op die insameling van inligting, die opstel van doeltreffende observasiepunte en radiogebruik.
Protospanne funksioneer as reaksiespanne vir AfriForum-buurtwagte om as eenhede vinnig en doeltreffend op noodsituasies waar gemeenskapsveiligheid bedreig word, te reageer. Diepgaande opleiding aan dié lede is noodsaaklik.
Volgens Jacques Broodryk, AfriForum se hoofwoordvoerder vir gemeenskapsveiligheid, is die protospankursus taai en só opgestel om lede voor te berei op uitdagende misdaadverwante situasies waarmee hulle moontlik gekonfronteer kan word. Lede moet byvoorbeeld ’n reeks nagskietoefeninge suksesvol voltooi. As deel van dié sessies word flitsende ligte en brandende motorbande ingespan om voornemende protospanlede te disoriënteer en die oefening so realisties as moontlik te maak.
AfriForum het tot dusver reeds meer as 220 protospanlede opgelei, wat landwyd ’n aktiewe rol speel in AfriForum se 177 buurt- en plaaswagstrukture. Nagenoeg 11 000 vrywilligers is betrokke by dié strukture.
