Toneelspelers van die Hoër Meisieskool Oranje het ’n lang rits eerbewyse gekry vir hul toneelstuk In die helder donker op Sondag 27 Julie se FAK Allegretto Toneelfees se Hugie Week Twee in Springs. Die produksie is as die beste leerlingproduksie aangewys.
Oranje se ander opvoering op die fees, DOP, was derde uit sowat 30 produksies en was ’n finalis om die eerbewys vir beste produksie te ontvang.
Die finaliste vir die nasionale ronde van dié tienertoneelfees (wat oor ses weke strek) word einde Augustus aangekondig.
Caitlin Erasmus, ’n gr. 11-leerling, is vir haar spel in DOP as die mees belowende vroulike speler aangewys.
DOP het talle goue eerbewyse ontvang. Dit was die beste wat betref: produksie, ensemble, tegniese hantering, spel (Caitlin), beligting (Lee-Anne Mouton), klank (Theresa-Louise Fourie), choreografie (Dominique du Plessis), verhoogbestuur en regie, kostuums, beligtingontwerp en klanksamestelling. Die produksie het silwer-eerbewyse ontvang vir spel (Dominique), grimering en dekor, asook brons vir sy plakkaat.
In die helder donker het goue eerbewyse gekry: tegnies, beligtingshantering (Miana Fourie), verhooghulp (Miné Truter) en verhoogbestuur (Cara Conradie).
Silwer is ontvang vir: spel (Dominique en Caitlin), regie (Lee-Anne), die plakkaat, produksie, klanksamestelling, klankhantering, ensemble, beligtingsontwerp en choreografie. Brons is toegeken vir spel (Theresa-Louise en Cara), kostuums en dekor.
