Sowat 500 poppe van alle uithoeke van die wêreld kon Vrydag (24/06) en Saterdag op ’n uitstalling in die Oorlogsmuseum van die Boererepublieke besigtig word.
Meisies en hul ma’s het gestroom na dié uitstalling wat moontlik gemaak is deur die Dolls and Toys-klub, die Oorlogsmuseum en die Nasionale Museum.
Betsie Roux, voorsitter van die Dolls and Toys-klub, sê daar was groot belangstelling en talle mense het die uitstalling bygewoon.
Mense het ook navrae gehad oor hul eie poppe – waarvan sommige iewers in ’n kas gebêre word en besondere versamelwaarde kan hê.
Een van die interessante poppe wat uitgestal is, is die Nelson Mandela-pop genaamd MissDela.
Daar was ook Winky-poppe uit die vroeë 1960’s, halfpoppe, besonderse Graaff-Reinet-poppe uit die vroeë 1920’s en selfs poppe van strooi uit die konsentrasiekampe van die Anglo-Boereoorlog.
Poppe en speelgoed van 19 vroue was deel van die uitstalling “Dolls around the World”.
Benewens poppe was daar enkele interessante speelgoed uit verskillende tydperke.
