Die Bloemfonteinse ster-menseredder Len-Douglas Mac Kay is ingesluit in die Suid-Afrikaanse senior span wat van 15 tot 18 September aan die vierjaarlikse Statebondspele in Windsor, Kanada, gaan deelneem.
Hy is die enigste menseredder van die Vrystaat wat in die nasionale span ingesluit is.
Die span is op 27 Mei tydens die Suid-Afrikaanse Interprovinsiale Mensereddingskampioenskapsbyeenkoms in Durban aangekondig.
Mac Kay het in die kampioenskap meegeding in die ysterman-nommer, wat behels dat deelnemers 400 m swem, 200 m hardloop, 800 m branderplank ry en 600 m plankswem.
Hy het ook op 6 Mei aan die interprovinsiale kampioenskapsbyeenkoms in Pretoria deelgeneem. Hier het hy twee eerste plekke, ’n tweede plek, ’n derde plek en twee vierde plekke behaal.
