Jong atlete van oor die Vrystaat heen het op Saterdag 17 Februarie die hitte aangedurf en talle het uitgeblink op die Laerskool Fichardtpark se Prestige-atletiekbyeenkoms wat in die Vrystaat-atletiekstadion aangebied is.
Meer as 1 000 atlete van 21 skole het aan die byeenkoms deelgeneem.
Die beste atleet op die byeenkoms, met die meeste punte, was Caleb Josephs van Grey-kollege (primêr). Caleb het ook die eerbewys vir die beste prestasie op die baan gekry. Hy het altesaam 2 414 punte gekry vir sy prestasies.
Caleb het die 80 m-hekkiesnommer vir o.13-seuns in ’n tyd van 11.18 gewen; was tweede in die 200 m-hekkies in 27.29; en het die 100 m in ’n tyd van 12.33 gewen.
Reuben Smith, ook van Grey, was eerste in die 200 m-hekkies.
Wian Botes (Grey) is as beste seunsatleet in die baannommers vereer.
Hy het twee rekords as o.13-seun opgestel. In diskusgooi het hy ’n afstand van 41,48 m gehaal, en in spiesgooi het hy die rekord met byna 9 m verbeter na 47,71 m. Milan Botes van die Laerskool Willem Postma is as die meisiesatleet met die beste prestasie in veldnommers aangewys. Die o.11-atleet het dít reggekry deur in die gewigstoot ’n afstand van 9,44 m te haal. Chani Brits van die Laer Meisiekool Oranje is aangewys as die beste meisies-baanatleet vir haar oorwinning in die 800 m en 1 500 m vir o.13-meisies. Sy is ook as beste langafstand-atleet in die o.13-ouderdomsgroep vereer. Atlete neem dié naweek aan die Motheo-byeenkoms deel.
