Sy het nooit eens geweet sy kan teken nie; nou maak sy gereed om kuns as matriekvak te neem.
Caroline Noxolo Paephele, ’n gr. 11-leerling aan die Martie du Plessis-skool, skryf baie netjies met haar twee vingers – een aan elke hand. Dit was egter eers verlede jaar toe die skoolhoof, Francois van Heerden, besluit het dat dié skool nou ook kuns as vak gaan aanbied, dat Caroline se kunstalent na vore getree het.
Betsie Lombard, die onderwyser wat nou vir tien gr. 10- en 17 gr. 11-leerlinge kuns aanbied, sê dit is wonderlik om te sien hoe die kinders se talent ontwikkel.
“Die kinders geniet die praktiese element van die vak,” sê Lombard.
“Almal hou egter nie ewe veel van die teorie-gedeelte nie.
“Dit is lekker om te sien hoe hulle die een ná die ander tegniek onder die knie kry en kreatief raak.”
Die kunswerke wat die leerlinge vir die eindeksamen moes skep, is in die skoolsaal uitgestal sodat almal kon deel in dit wat hulle met hul talente kan uitrig.
Caroline hou die meeste daarvan om met pastel te teken.
“Sy is baie onafhanklik en hou nie daarvan as ander mense iets vir haar moet doen soos om die verfkwaste te gaan was nie. Sy verkies pastelle, waarmee sy pragtige kuns skep.”
Lombard sê sy is baie opgewonde dat die leerlinge volgende jaar hul kunswerke vir Bloemskou se kuns-afdeling sal inskryf.
