Paasnaweek begin vir baie gesinne met Paasvrydag waarop die verhaal van Jesus wat die vis en brood vermeerder het en aan die skare laat uitdeel het, versinnebeeld word met die eet van gepekelde vis en broodjies.
Lucielle Kreling deel haar heerlike resep vir gepekelde vis wat sy vooraf maak sodat die vis die sous lekker kan intrek. Die vis word saam met Paasbolletjies bedien.
Die resep kan aangepas word vir ’n kleiner gereg.
Vir die vis benodig jy:
2 kg stokvisfilette
sout
peper
visspeserye
12 eiers
2 koppies meel
Pekel
6 groot uie
1½ liter water
10 lourierblare
3 eetlepels peperkorrels
2 eetlepels borrie
3 eetlepels koljander, korrels
2 teelepels fyn dhanya-poeier
3 eetlepels packo masala
½ koppie olie
1 koppie wit asyn
1½ koppies suiker
4 eetlepels mielieblom (Maizena)
2 teelepels sout
Maak so
Strooi sout en peper en visspeserye oor die vis, doop dit in meel en dan die eiermengsel en bak dan in die olie tot bruin en gaar.
Sny die uie vir die pekel in ringe en kook tot deursigtig en sag. Water af en gebruik weer 1½ liter koue water
en bring tot kookpunt.
Voeg die loerierblare, peperkorrels, borrie, koljander korrels, dhanya-poeier, masala, olie, wit asyn, suiker en sout saam.
Kook vir omtrent ¾ uur op ’n stadige hitte totdat die speserye goed deurgekook het.
Meng die mielieblom in ’n ¾ koppie water en voeg dit by jou pekelsous. Kook vir 10 minute.
Gooi die pekel oor die vis en laat staan verkieslik vir twee dae voordat dit geëet word.
